अछाममा चट्याङले लागेर ४ जना घाईते भएका छन् । जिल्लाको कमलबजार नगरपालिका वडा नं. १ मुलीका ४ जना घाईते भएका हुन् ।

शोमबार राती आएको हावाहुरी, बर्षा संगै परेको चट्याङले लागेर ४ जना महिला घाइते भएका हुन् । घाईते हुनेमा नगरपालिकाको वडा नं १ मुली निवासीे १८ बर्षिया गिता कुमारी रावत बिष्ट, ३२ बर्षिया धिर्जा बजगाई, ३० वर्षिया सरस्वती बजगाई, र ५० वर्षिया मोतिकला बजगाई रहेको ईलाका प्रहरी कार्यालय कमलबजारका प्रहरी निरिक्षक तथा ईन्चार्ज भास्कर चन्दले जानकारी दिनुभयो ।

घाइते मध्ये अन्यको भन्दा गिताको अवस्था गम्भीर रहेकाले थप उपचारका लागि नेपालगन्ज रेफर गरिएको प्राथमिक स्वास्थ केन्द्र कमलबजारका डाक्टर अनमोल थापाले जानकारी दिनुभयो । अन्य तीन जना घाइते लाई थप उपचारका लागि सदरमुकाम मंगलसेन रिफर गरिएको डा. थापाले बताउनु भएको छ । सोही वडामै चट्याङ लागेर एउटा भैसी पनि मरेको र घरमा पनि क्षति भएको स्थानीय कमल विकले बताउनुभयो ।

अछाम जिल्लाको समग्र क्षतिको विवरण आउन वाँकी रहेको जिल्ला प्रहरी कार्यालयका प्रवक्ता कैलाश सिंह विष्टले जानकारी दिनु भएको छ ।

मंगलबार, बुधबार र बिहिबार लगातार मौसम बदली हुने र यो समयमा हावाहुरी, चट्याङको बढि नै जोखिम रहने भएकाले सचेत रहन मौसमविद्को सुझाब छ ।